Psa 79 | MMX | STEP | O Moroa, lavamolon digara buxup beles pam at lenep kangka ram. Digara lox amexexe vam loogu laplavang kaala ram la ira lok kapmek axap. La diga sele utut kepe lemenemen silok Jerusalem.

Psalms 79

Lisingising Ti Lox Asepmus Leme Israel

1 O Moroa, lavamolon digara buxup beles pam at lenep kangka ram. Digara lox amexexe vam loogu laplavang kaala ram la ira lok kapmek axap. La diga sele utut kepe lemenemen silok Jerusalem. 2 Diga ke xepe lenbantuxu at limixin taram kusu ri lempatpixa silok; diga ke xepe lenbantuxu at limixin akmokso ram kusu ri laxampanga sio mi lavanuet kangkedek atdi ri anan. 3 Digap sev asu ladaada at limixin taram ngan ta ladan, la ladaada ga sesen ngan ladan to at lengkot axap keneng Jerusalem, la goxopmen tara ga roo su xusu rik mikmit avukat limixin diga remet. 4 Limixin at laranep silok dik lok kangkan nema diga paase mumu parang nama; digang longon sese nama la diga paase aksaksa rinama.

5 Leeme Silok. Kereva, lebelemamao ram tinema noxo xap ta? Kereva, mo lebelemamao ram nabak lok amisik ta la naba babao ngan laxao? 6 Una lok pukus mo lebelemamao ram kusu na subu mavana at levennep silok no dixo lotu saparav u, la pana atnedi no dixo ngising saparav u; 7 atla diga sev amet pam limixin taram; digara lok kapmek lengkot axap at lenep Israel, ni lenep kangka ram. 8 Uguta lox asongot nema mumu laxakapmek at lavalabat atnema. Una belemumu nga nema mo; atla ma baava rino.

9 O Moroa, una lok tooro nema la una lox aroo nema; una lox asepsu nema basinge na lumumuat la una doma xepe laxapmek atnema xusu levenabung mixin petpes diba lok ngangao ram. 10 I lok kapmek do limixin at levenabung mixin petpes diba lok tinema dola, “Ne Moroa nga ua atnemi?” Ma vara i do una lox asongot levenabung mixin petpes atla digap sep amet buaang atnema limixin axa ram. 11 Una ronga lerengteng at limixin dik lok at loxokoxo, la mi mo lolos taram una lox asepmus nedi mo di gagas kusu dina met.

12 Leeme Silok, una vorang i ridi laranep silok, mi tavanuti teveloklok asongot axap, mumu mo laxaloklok aksaksa digak lox i ru. 13 Kuren la nema limixin taram, ma ngan laxasipsip taram, manaba tong avukat amisik tu la manaba emi asu amisik minu at levenaleng axap i tu melamgo atnema.